డెలివరీ ఏజెంట్‌కు పిజ్జా ఇస్తే.. ఊహించని సమాధానంతో షాకైన కస్టమర్!

భారీ వర్షంలో సైతం శ్రమించి ఆర్డర్‌ను డెలివరీ చేసిన ఏజెంట్ పట్ల సానుకూల దృక్పథంతో ఓ కస్టమర్ ఉచితంగా పిజ్జాను ఆఫర్ చేయగా, దానిని సదరు ఏజెంట్ తిరస్కరించిన తీరు ప్రస్తుతం సామాజిక మాధ్యమాల్లో వైరల్‌గా మారింది. ఈ ఘటనలో డెలివరీ ఏజెంట్ ఇచ్చిన అనూహ్య సమాధానం నెటిజన్ల మధ్య ఆసక్తికర చర్చకు దారితీసింది.

న్యూఢిల్లీకి చెందిన ముకుల్ దేఖానె అనే వ్యక్తి జొమాటోలో 'బై వన్ గెట్ వన్' ఆఫర్ కింద రెండు పిజ్జాలను ఆర్డర్ చేశారు. ప్రతికూల వాతావరణంలోనూ సకాలంలో డెలివరీ చేసినందుకు కృతజ్ఞతగా, ఒక పిజ్జాను సదరు డెలివరీ ఏజెంట్‌కు ఇవ్వజూపారు. అయితే, ఆ ఏజెంట్ దానిని సున్నితంగా తిరస్కరించడమే కాకుండా, "ఈ జంక్ ఫుడ్‌ను మీరే తీసుకోండి, ఇలాంటి చెత్త నాకొద్దు.. నేను ఇంటి భోజనమే తింటాను" అని దిమ్మదిరిగేలా బదులిచ్చి అక్కడి నుంచి వెళ్లిపోయాడు.

ఈ హఠాత్మపరిణామంతో విస్మయానికి గురైన ముకుల్, తన అనుభవాన్ని జూన్ 12న 'ఎక్స్' వేదికగా పంచుకున్నారు. ఈ పోస్ట్ అతి తక్కువ సమయంలోనే వైరల్‌గా మారింది. దీనిపై స్పందించిన నెటిజన్లు భిన్నాభిప్రాయాలు వ్యక్తం చేస్తున్నారు. ఆహారం ఇచ్చే ప్రయత్నం కంటే నగదు రూపంలో కొంత టిప్ ఇవ్వడం ఉత్తమమని కొందరు సూచించగా, ఫాస్ట్ ఫుడ్ కంటే ఇంటి భోజనమే ఆరోగ్యకరమని ఏజెంట్ చెప్పిన మాటల్లో 'నిజం' దాగి ఉందని మరికొందరు అభిప్రాయపడుతున్నారు.